VIANDUNJE VYA NIGERIA MMOJA AFUNGA NDOA, AFANYA KUFURU

HIVI karibuni kulikuwa na shangwe, hoihoi nderemo na vifijo pale muigizaji nyota wa filamu wa Nigeria, Chinedu Ikedieze, maarufu kwa jina la Aki (33), alipofunga pingu za maisha na mrembo Nneoma Hope Nwajah (20) katika kitongoji cha Mbano kilichopo katika Jimbo la Imo. 

Aki, mmoja wa mastaa `mbilikimo’ na `pacha wake katika filamu’, Osita Iheme (Ukwa) ni marafiki wakubwa ambao wamefanikiwa kuigiza filamu nyingi na kuliteka soko la tasnia hiyo katika mataifa mbalimbali ya Afrika na nje ya Afrika, Tanzania ikiwemo. 

Harusi hiyo iliyokuwa na vionjo vyote vya kimila ilifanyika katika Kanisa Katoliki la Mtakatifu Theresa lililopo katika viwanja vya Shule ya Msingi ya Obolo katika kitongoji hicho cha Mbano. 
Haikuwa harusi ya ‘kitoto’ kwani Rais wa Nigeria Goodluck Jonathan na mkewe walialikwa na kuhudhuria sherehe hiyo. 

Wageni wengine mashuhuri waliokuwa wamethibitisha ni magavana watatu kutoka majimbo ya Kusini Mashariki mwa nchi ya Nigeria. Hao si wengine bali Gavana wa Jimbo la Abia, T.A. Orji, Jimbo la Imo, Rochas Okorocha na wa Jimbo la Anambra, Peter Obi. 

Rafiki mkubwa wa karibu wa Aki kwa zaidi ya miaka kumi sasa, Osita Iheme (Ukwa), ndiye aliyekuwa mwambata (best man) wa bwana harusi. Chanzo cha uchumba wao Staa Aki na Nneoma wamekuwa wachumba kwa miaka mitatu sasa, katika kipindi ambacho wameoneshana mapenzi ya dhati baina yao. 

Hatimaye Aki amepata mwenza na kuweka mambo hadharani namna alivyoweza kukutana na mpenzi wake huyo na kujikuta akitumbukia katika dimbwi kubwa la mahaba mithili ya bahari na kuwa vigumu kwake kuweza kujinasua. Mwenyewe anasema mkewe huyo sasa ni sehemu ya maisha yake yote yaliyosalia hapa duniani. 

“Tumekuwa katika lindi la mahaba kwa miaka mitatu, nilikutana naye Lagos na katika hali isiyoelezeka ghafla tulijikuta tukizama katika ulimwengu wa mapenzi.Yeye sasa ni tumaini la maisha yangu yote, na hakuna zaidi ya kifo kitakachotutenganisha,” Aki aliapa. 

Anapoulizwa mkewe alivutiwa zaidi na nini kwake, Aki alikuwa na haya ya kusema “aliniambia ananipenda kwa vile mimi ni mtu mzima, ni mwelewa, mwenye mvuto, busara na upendo wa dhati.” 

Akijibu swali la ni watoto wangapi angependa kupata na mkewe huyo, Aki anasema “Si zaidi ya watoto watatu bila kujali jinsi yoyote watakayokuwa nayo.” Kuhusu tetesi kwamba alitumbukia kwenye penzi na mrembo huyo kutokana na haiba yake iliyojielekeza zaidi katika kumcha Mungu, Aki anasema hilo pia limechangia kuongeza nafasi ya pendo kwa mkewe. 

Muigizaji huyo ambaye amejinyakulia tuzo nyingi ikiwemo tuzo ya heshima ya Taifa la Nigeria ya MFR mwaka mmoja uliopita, anasema anajisikia mwenye faraja kwa vile tuzo hizo zinamuweka karibu na watu wengi wa kawaida. 

Mke wa Aki, Nneoma, akizungumzia uamuzi wake wa kufunga ndoa na Aki akiwa na umri huo wa miaka 20 huku akionekana kuwa mwanamke mrembo, anasema amechukua uamuzi huo kutokana na kuongozwa na matakwa ya Mungu. 

Machungu katika safari ya mapenzi 

Akiwa katika maumivu makali ya kumsaka mrembo wa kuishi naye kwa maisha yake yote yaliyosalia duniani, Aki alivumilia hali hiyo kwa miaka mingi. Kabla ya kupata mafanikio hayo, muigizaji huyo mwenye utajiri mkubwa wa fedha, akiwa na majumba na magari ya kifahari, alimchumbia ofisa wa benki, aitwaye Nkechi kutoka eneo la Delta, uchumba ambao ulikufa ghafla katika tukio ambalo halijatolewa maelezo yoyote ya maana hadi sasa. 

Haikuchukua muda mrefu baada ya hapo, milionea huyo alianzisha mahusiano mengine ya mapenzi ya nguvu na mwanamke mwingine. Uhusiano huo nao ulikatika ghafla. Sasa hatimaye Aki amekamilisha safari yake hiyo kwa kufunga pingu ya maisha na Nneoma. 

Sherehe hiyo ya harusi ya kimila iliyofanyika karibuni na kuwajumuisha ndugu, jamaa na marafiki ilishuhudiwa na mamia ya wananchi wa kitongoji hicho cha Mbano ambako Nneoma amezaliwa. 

Habari njema zinasema sherehe hiyo ya harusi itafuatiwa na pati babu kubwa iliyofanyika katika Jiji maarufu la Lagos, Desemba 10, mwaka huu. 

Historia ya maisha yake 

Aki, anasema kwa kila filamu yao hulipwa kati ya dola 8,000 na 30,000 (kati ya Sh milioni 15 na milioni 52), alizaliwa Desemba 12 mwaka 1977 katika kitongoji cha Bende katika Jimbo la Abia. Amejipatia umaarufu mkubwa kwa kuigiza filamu mbalimbali zijulikanazo duniani kwa jina la filamu za Aki na Ukwa. 

Mwaka 2007, Aki alipata mafanikio makubwa katika maisha yake pale alipotwaa taji la Muigizaji Bora wa Afrika, taji linalotolewa na Taasisi ya Filamu ya Afrika (AMA). 

Hadi mwaka 2002 ilipotokea bahati wakakutana katika mojawapo ya matamasha ya sanaa, si Aki wala Ukwa aliyekuwa anajua kwamba wanavyo vipaji na ubunifu ambao kama wataviunganisha kwa pamoja wataweza kuteka soko la filamu duniani. 

Umaarufu wao umewafanya waigizaji hao wafupi lakini wenye makeke mengi kupata mialiko mingi na yenye malipo makubwa kutoka nchi mbalimbali duniani. 

Aki ni msomi wa Shahada ya Mawasiliano kwa Umma aliyotunukiwa na Taasisi ya Uongozi na Teknolojia (IMT) ya Enugu wakati Ukwa hivi sasa ni mwanafunzi wa mwaka wa pili wa Kozi ya Mawasiliano kwa Umma katika Chuo Kikuu cha Serikali cha Enugu. 

Ingawa wamejipatia mafanikio makubwa katika tasnia ya filamu, lakini magwiji hao wa vichekesho wamebaini changamoto mbalimbali zinazowakabili wao na dunia kwa ujumla na hivyo kuamua kuongeza viwango vyao vya elimu.

“Nilizaliwa katika familia ya Mzee Michael Ikedieze Ogbonna. Nimekulia katika kijiji cha Iluoma Nzeakoli ndani ya eneo la Bende katika Jimbo la Abia. Baada ya kuhitimu elimu ya msingi na sekondari , niliendelea na elimu ya juu katika Taasisi ya IMT Enugu, ambako nilihitimu kozi ya Mawasiliano kwa Umma. 

“Uigizaji ni kipaji nilichopewa na Mungu tangu nikiwa mtoto. Kwa mfano nikiwa sekondari nilikuwa mwanachama wa kikundi cha sanaa na uigizaji cha shule. Nafasi muhimu ilijitokeza wakati nikiwa mwaka wa kwanza Chuo cha IMT, Agosti mwaka 1998, siku ambayo nilikutana na rafiki ambaye nilimfahamisha kuhusu lengo langu la kuwa muigizaji. 

“Nilipomwambia kuhusu hilo na kwamba napenda kuona siku moja ninashiriki katika uigizaji wa filamu zinazozalishwa nchini mwangu Nigeria, aliniahidi kunichukua kesho yake hadi katika Hoteli ya Ogui hapa katika mji wa Enugu, ambako kulikuwa na tamasha la kuwasaka wasanii nyota ili kutengeneza filamu ya ‘Evil Men’. Waandaaji waliniona na kunichagua kuingia kushiriki katika filamu ile, hapo ndipo nilipoanzia,” anasema Aki. 

Jamii inazitazama vipi filamu zao? 

Kasheshe kubwa ilizuka hivi karibuni pale baadhi ya wazazi wa nchini Nigeria walipotishia kuzipiga marufuku filamu zilizochezwa na Aki na Ukwa kwa madai kuwa, zinatoa mafundisho mabaya kwa watoto wao. 

Wazazi hao wanasema, filamu nyingi zinazochezwa na waigizaji hao zinaonesha dharau kwa watu wazima na kuwafundisha wizi vijana. “Vijana wengi wamekuwa wakiiga matukio yanayofanywa na Aki na Ukwa kwenye filamu wanazocheza, hivyo kuathirika,” amesema mmoja wa wazazi hao, aliyehojiwa na mtandao wa Nigeriafilms. 

Mzazi mwingine anasema, matukio ya wizi yamekuwa yakiongezeka ikilinganishwa na miaka ya nyuma, wahusika wakuu wakiwa vijana wa umri mdogo kutokana na kuiga tabia za wacheza filamu hao. 

Wazazi hao wamedai kuwa, vijana wengi wa umri mdogo nchini Nigeria wanapenda kuishi maisha yanayofanana na yale ya Aki na Ukwa bila kujua kuwa ni ya uigizaji. 

Baadhi ya wazazi wamehoji ni kwa nini filamu zote wanazoshiriki kucheza vijana hao, zinaonesha vitendo vya uovu katika jamii badala ya mafundisho mema. “Kama huoneshi matendo mazuri kwa vijana wako nyumbani, lazima watakuiga,”anasema mmoja wa wazazi hao. 

Mzazi huyo anasema wanawapa changamoto waandaaji wa filamu wa Nollywood, kubadili mwelekeo kwa kuandaa sinema, ambazo haziwezi kuathiri maisha ya vijana wao. “Wanapaswa kutengeneza filamu zenye mwelekeo chanya. Vijana ni wepesi wa kuiga na wakifanya hivyo, wanaonesha picha mbaya ya Wanigeria,” anaongeza. 

Hata hivyo harusi ya Aki inaelezwa kwamba itamaliza kabisa hisia mbaya za wazazi wa Nigeria kwamba waigizaji hao si kioo kizuri kwa jamii kutokana na visa na mikasa ikiwemo ya usaliti katika mapenzi wanayoiigiza katika filamu zao. 

Ndoa ya Aki inatajwa kuwa mfano wa kuigwa ambao utaibua mwanzo wa mapinduzi mapya ya fikra za vijana wa Nigeria kuhusu ndoa na familia kwa ujumla katika misingi ya kuheshimu mila, desturi na Mungu. 

Huyo ndiye muigizaji Aki ambaye ameiaga rasmi kambi ya ukapera kwa kumuoa mrembo mbichi, Nneoma baada ya miaka mingi ya tabu, shida, mateso, na kero za mapenzi.

MWENYE MTOTO HUYU KAZI ANAYO!!

nilipomsogelea karibu ili nimchape hii picha..ndio hivyo tena

macho yote nnje alijua nitamtoa eneo hilo. 

WATATU WAUAWA KATIKA MASHAMBULIO KENYA

Mmoja ya waliojeruhiwa akihudumiwa hospitalini Garissa,

Takriban watu watatu wameuawa katika shambulio mashariki mwa Kenya, maafisa wanasema.

Zaidi ya watu 27 wamejeruhiwa kwenye shambulio la guruneti katika mji wa Garissa, karibu na mpaka wa Somalia.

Awali, mwanajeshi wa Kenya aliuawa katika mlipuko wa bomu katika mji wa mpakani wa Mandera.

Wanajeshi wa Kenya wako nchini Somalia tangu mwezi Oktoba kukabiliana na waasi wa kundi la al-Shabab ambao wanasema walishambulia maafisa wao wa usalama na watalii nchini Kenya.

Katika moja ya shambulio kwenye hoteli mjini Garissa, huku shambulio jingine katika barabara za mji huo likasababisha kifo cha mtu wa tatu, vyanzo vya polisi vilisema. Watu kumi na mbili walijeruhiwa vibaya.

" Wawili walifariki dunia katika hoteli ya Holiday Inn inafahamika na wakaazi kama Kwa Chege. Mwingine alifariki dunia katika shambulio kwenye barabara inayofahamika kama ya Ngamia," afisa wa polisi alisema.

Alipoulizwa nini kilisababisha mlipuko huo, alisema: " Haya yalikuwa maguruneti", akiongeza kuwa wengine ya wale waliojeruhiwa ni kutokana na maguruneti hayo.

Mkaazi mmoja wa eneo hilo Hussein Abdi ameliambia shirika la habari la AFP kulikuwa na hali ya taharuki katikati mwa mji huo sehemu ambay mlipuko ulitokea.

Mji wa Garissa ni mji mkuu wa mkoa wa Kaskazini mashariki, na uko kilomita 100 (maili 60) kutoka mpaka wa Somalia.

CHEKA UKIONA PANA CHEKESHA, KAMA HAPACHEKESHI HUZUNIKA

NYOKA KITANDANI

Uso kwa uso na nyoka

Msichana mmoja nchini Poland aliyekuwa amelala, aliota kuwa anakumbatiana na mpenzi wake, na alipozinduka, alikuta amekumbatia nyoka.

Msichana huyo Iga Radkiewicz wa mjini Krakow, Poland, amesema aliruka kutoka kitandani huku akitetemeka. "Nilikuwa naota njozi murua kuhusu mimi na mwanaume wangu, lakini niliposhituka, nikakuta naangaliana macho kwa macho na bonge la nyoka" amesema Iga.

"Kidogo nife kwa hofu" amesema msichana huyo mwenye umri wa miaka 19, akikaririwa na gazeti la Croatian Times. Wataalam wa nyoka walimkamata nyoka huyo, ambaye hata hivyo imeelezwa kuwa sio nyoka hatari na wala hana madhara yoyote.

Msemaji wa polisi amesema nyoka huyo alitoroka kutoka katika duka moja la kuuzia wanyama wa kufuga, na alikuwa akitafuta joto tu.

WEVI WASAHAULIFU

Usisahau mafuta

Wezi wawili, wanawake hapa Uingereza waliingia katika duka moja na kuiba pombe, lakini wakasahau kuweka mafuta ndani ya gari walilotumia kubebea mali waliyoiba.

Kinamama hao Devlin mwenye miaka 59 na mwenzake Egan mwenye miaka 52 walionekana wakiiba pombe yenye thamani ya karibu dola elfu moja.

Hata hivyo baada ya kufanya wizi huo waliingia katika gari lao na kuondoka lakini hawakufika mbali, kwani gari hilo liliisha mafuta na kuzimika.

Wawili hao walilazimika kulisukuma gari lao hadi kwenye kituo cha mafuta na kununua mafuta na kisha kuondoka, bila kufahamu kuwa kila wanachokifanya kinarekodiwa na kamera maalum za usalama, CCTV. Gazeti la Metro limesema wawili hao wamekiri kufanya wizi katika mahakama ya Manchester.

Pombe walizoiba zilikuwa nyingi kiasi kwamba walipata tabu kufunga buti ya gari.

UZURI

Daktari feki alikuwa akimdunga sindano za simenti

Mwanamama mmoja nchini Marekani aliyetaka kuutengeneza mwili wake uwe wa kuvutia zaidi amejikuta matatani, baada ya kudungwa sindani za saruji na gundi ili kuongeza ukubwa wa makalio yake.

Mwanamke huyo ambaye hakutajwa jina kutokana na sababu za kisheria, alikuwa akitaka kufanya kazi katika klabu ya usiku, na hivyo alitafuta daktari anayeweza kumbadilisha, lakini kwa bei nafuu.

Polisi wamesema mwanamke huyo alikutana na mwanamke mwingine aliyejifanya ni daktari, na kuanza kujaza mwili wake kwa saruji, gundi ya kuzibia matairi na mafuta. Msichana huyo alilipa dola mia saba ili kupatiwa hips ba makalio ya kuvutia.

Hata hivyo sindano za mchanganyiko wa saruji, na mafuta na gundi zilimsababishia maumivu makali na akalazimika kwenda hospitali. Kila alipokwenda hospitali kutokana na maumivu alikuwa akiona aibu kusema hasa chanzo cha maumivu yake.

Hata hivyo mama wa msichana huyo alimbana mwanaye hadi akasema kilichomsibu. Polisi walimkamata daktari huyo feki na kumshtaki kwa kosa la kufanya udaktari bila leseni na pia kusababisha maumivu.

Mamlaka za huko zinasema huenda kuna wasichana wengine wengi wamekubwa na jambo hilo lakini wanaona aibu kujitokeza.

DOLA KIBAO

Mabunda ya noti

Sanduku moja linalodhaniwa kuwa na dola milioni moja liliachwa katika mgahawa mmoja mjini Sydney Australia na kusababisha tafrani.

Wamiliki wa mgahawa huo, walidhani sanduku hilo ni bomu na hivyo kuliweka nje na kuita polisi. Watu walioshuhudia wamesema waliona polisi wakifungua sanduku hilo kwa tahadhari na kukuta mabunda ya noti za dola za Kimarekani.

Taarifa zinasema inawezekana sanduku hilo liliachwa na awali mtu moja anayedhaniwa kuwa na umri wa miaka thelathini aliyeingia katika mgahawa huo na kuagiza kahawa.

Polisi wamegoma kuthibitisha ni kiasi gani cha fedha kilichokuwemo ndani ya sanduku hilo

WADAU HILO NDIO, KIGAMBONI BRIDGE LITAKAVYO KUA

HAPPY BIRTHDAY YA MAMA PAUL ILIVYOPENDEZA!!

Mzuka ushapanda Bro Moses

Mshike mshike kwa mama paul

Ohoo jamani watu na mzuka...Mama Paul oyeeee

Ilikua full kujiachia

Hii inaitwaje vile...mugongo mugongo au nipishe nipite..wanaojua msaada juu ya ngazi wadau

Aunt wetu nae hakuwa nyuma kabisa wa kwanza kushoto..akiwa na mgeni wetu toka london

Majiga...Aunt... Zela boy

Dada pia alikuwepo...husindile

New generation walikuwepo pia

Wageni waalikwa wa Mama Paul

Mamaetu mpendwa Mama Paul katikati akiwa tayari kabisa kuwalisha cake...Aunt na Shemeji wa bro Moses

Kwakweli kila mtu alifurahi...kama picha inavyoonekana

Mawaziri watangaza kujiuzulu Misri

 21 Novemba, 2011 - Saa 23:20 GMT

• Facebook
• Twitter
• Tuma kwa rafiki yako
• Chapisha

Waandamanaji wajificha kwa kipande cha bati

Baraza la mawaziri la Misri limeomba kujiuzulu kufuatia maandamano ya siku tatu kupinga watawala wa kijeshi nchini humo,televisheni ya taifa imeripoti.

Msemaji wa baraza hilo la mawaziri Mohammed Hegazy amesema kwamba ombi lao la kujiuzulu bado halijakubaliwa na baraza la kijeshi linalotawala Misri.

Na wakati msemaji huyo alipokuwa akitoa taarifa,maelfu ya waandamanaji waliendelea kufika katika medani ya Tahrir.

Kufikia sasa zaidi ya watu 30 wameuwawa na wengine wapatao 1,800 kujeruhiwa kutokana na machafuko ya siku tatu yalioshuhudiwa katika mjini Cairo.

Wakereketwa na waandamanaji wamekuwa wakilishinikiza baraza kuu la kijeshi linalotawala kukabidhi mamlaka kwa serikali ya kiraia.

Lakini hatua ya baraza la mawaziri la kutaka kujiuzulu huenda ikaitumbukiza nchi hiyo katika mzozo zaidi wa kisiasa.

Tangazo la kutaka kujiuzulu litatafrisiwa kama ushindi kwa waandamanaji na huenda likawachochea kutoa matakwa zaidi .

Hii pia huenda ikalitatiza baraza kuu la kijeshi.Swali kubwa kwao ni Jee, walirudishe tena baraza hilo lililoomba kujiuzulu au wateuwe baraza jipya? lakini kwa vyovyote vile kutakuwa na shinikizo za kutaka serikali ya kiraia ipewe uwezo zaidi.

Katika kipindi kizima cha maandamano, baraza hilo la kijeshi limekuwa likilaumiwa kwa kujipa madaraka makubwa.

SERIKALI KUPANGA ADA SHULE ZOTE

KUANZIA Januari shule zote nchini zitalazimika kutoza ada mpya itakayopangwa na Serikali. Hatua hiyo inatokana na Serikali kuahidi kabla ya mwisho wa mwezi ujao, kutoa waraka wa ada mpya za shule binafsi na za Serikali. Kwa sasa waraka unaotumika ni namba 19 wa mwaka 2002 ambao ulipanga ada kwa shule binafsi za bweni za sekondari kuwa Sh 380,000 kwa mwaka na za kutwa Sh 150,000. Hata hivyo, kutokana na muda mrefu kupita na mazingira kubadilika, shule hizo zimekuwa zikijipangia ada bila kufuata waraka huo. Naibu Waziri wa Elimu na Mafunzo ya Ufundi, Philipo Mulugo, alitoa maelezo hayo jana wakati akijibu swali la msingi la Mbunge wa Viti Maalumu, Rukia Kassim Ahmed (CUF). Rukia alihoji sababu za Serikali kutoingilia suala hilo na kuweka viwango elekezi vya ada ili kusiwe na mkanganyiko wa kielimu. Akijibu swali hilo, Mulugo alisema Wizara ya Elimu na Mafunzo ya Ufundi, imeandaa rasimu ya maoni kutoka kwa wadau ili wapitie na kuamua kwa pamoja juu ya viwango vya ada kwa shule zote za Serikali na za binafsi nchini. “Wizara yangu itahakikisha viwango vya ada vitakavyowekwa vinazingitia gharama halisi ya kila mwanafunzi na kuweka uwiano katika ulipaji na utoaji ada,” alisema Mulugo. Mwishoni mwa mwezi uliopita, Rais Jakaya Kikwete, akiwa kwenye mahafali ya 11 ya shule za sekondari za FEZA, Dar es Salaam, alisema elimu ni huduma na si bidhaa ya kuuzwa kwa bei ghali, kama zinavyofanya baadhi ya shule binafsi nchini. “Natoa mwito wa kuangalia upya mifumo yenu ya ada, ili kuwawezesha wazazi wengi zaidi kuwaleta watoto wao katika shule zetu. Elimu ni huduma si bidhaa kama zilivyo bidhaa nyingine, ambako faida ndicho kichocheo kikubwa cha kuwekeza,” alisema Rais Kikwete katika mahafali hayo. Kabla ya tamko hilo, Rais Kikwete wakati akikabidhi hati idhini kwa vyuo vikuu tisa nchini mwaka huu, alielezea nia yake ya kuundwa chombo maalumu cha kusimamia viwango vya ada kwa shule binafsi hadi vyuo vikuu, kwa kuwa kiasi kinacholipwa kwa sasa ni kikubwa na hakiendani na maisha halisi ya Watanzania. Aliwataka wawekezaji katika elimu kuondoa mawazo kuwa shule ni kitega uchumi cha kuwapatia faida kwa kuwa wakifikia hatua hiyo ni hatari kwa ustawi wa nchi. Alitoa mfano kuwa hivi sasa kuna shule za chekechea zinazotoza ada kubwa hata kuliko inayotozwa na vyuo vya elimu ya juu nchini. “Kuna haja ya kuunda chombo kama Ewura (Mamlaka ya Udhibiti wa Nishati na Maji) ambacho kazi yake itakuwa inaangalia viwango vya ada kuanzia shule za chekechekea za binafsi hadi vyuo vikuu. “Lengo ni kuwawezesha Watanzania wengi wenye kipato cha kawaida kumudu kulipa badala ya hali ilivyo sasa ambapo watu wachache ndiyo wanaofaidi elimu hiyo,” alisema. Hata hivyo shule nyingi za binafsi hususan zinazomilikiwa na taasisi za kidini, zimekuwa zikikubaliana na utaratibu wa ada elekezi ya Serikali, lakini mara zote zimekuwa zikilalamikia gharama za uendeshaji kuwa kubwa. Baadhi yao zimekuwa zikiomba Serikali isaidie kuzilipia mishahara ya walimu ili zibakie na majukumu mengine ya uendeshaji ili kuwezesha kutoza ada nafuu.

MUHAMMAD ALI AHUDHURIA MAZIKO YA FRAZIER

Joe Frazier enzi za uhai wake katika masumbwi

Muhammad Ali na mabondia maarufu walihudhuria ibada ya mazishi ya bingwa wa zamani wa uzito wa juu duniani Joe Frazier mjini Philadelphia siku ya Jumatatu.

Taarifa zinazohusiana

• Michezo

Baadhi ya mabondia maarufu wa zamani waliohudhuria mazishi hayo ni pamoja na Larry Holmes, Mike Tyson na kiongozi wa wanaharakati wa kupigania haki za binadamu mchungaji Jesse Jackson walitoa heshima zao za mwisho katika kanisa la Enon Tabernacle Baptist.

Frazier alishinda medali ya dhahabu mwaka 1964 katika michezo ya Olimpiki na alikuwa bingwa wa masumbwi wa uzito wa juu duniani kuanzia mwaka 1968 hadi 1973.

Lakini Frazier umaarufu wake unazungumzwa zaidi kutokana na mapambano yake ya kukata na shoka dhidi ya Ali katika miaka ya 1970.

Na katika risala ya rambirambi iliyokuwa ya kusisimua, Mchungaji Jackson alitaka jiji la Philadephia kumtukuza na kumjengea heshima Frazier, akimlinganisha kwa umaarufu na mcheza sinema mashuhuri Sylvester Stallone, ambaye sanamu yake imewekwa katika jiji hilo.

Rocky ni mtu ambaye hakuwepo, alisema Jackson. "Rocky kamwe hakuonja damu yake. Rocky hakuwahi kukabiliana na Ken Norton. Kamwe hakupambana na Ali. Halikadhalika hakuwahi kuchapana na Larry Holmes.

"Joe anastahiki kuheshimika ,ni mtu wa kupigiwa mfano kwa sababu ya kupenda familia, Joe wa kawaida aliyekuwa na vitu vingi vya ajabu."

"Ataendelea kuwa jirani yetu. Ataendelea kubakia mwenzetu kanisani. Ataendelea kubakia mtu kutoka mitaani, kwa hiyo Philadelphia itakuwa imejiwekea sifa kwa kumheshimu Joe Frazier, lakini hili lisichelewe kufanyika."

Alipoulizwa na waandishi wa habari Frazier akumbukwe vipi, Mchungaji Jackson alijibu: "Kama bingwa mashuhuri wa ngumi na binadamu wa kutukuka. Bingwa wa ngumi kwa sababu aliwahi kushinda medali ya dhahabu, kwa sababu hakuirithi hiyo medali, aliifanyia kazi kubwa."

Wakati huo huo binti wa Frazier, Renar Frazier-Martin - mmoja kati ya watoto 11 na wajukuu 28 wa Frazier - alisema atamkumbuka baba yake kila mara alikuwa mstari wa mbele kwa watoto wake, hasa kwa sababu unapokuwa na watoto 11, ni kazi ngumu. Lakini kila mara alikuwa nasi nyumbani, wajukuu wake na familia nzima."

Katika ibada hiyo ya mazishi iliyochukua muda wa saa mbili, Tyson, mfanyabiashara Donald Trump na muigizaji Mickey Rourke walituma salamu za rambirambi kwa mkanda wa video.

ELIMU YA MSINGI KUWA MIAKA SITA

SERIKALI inakusudia kubadili mfumo wa elimu nchini ambapo kuanzia mwakani, elimu ya msingi inapendekezwa kuwa miaka sita badala ya saba kama ilivyo sasa huku elimu ya sekondari kuwa ya lazima. Pamoja na hilo, wanafunzi wanaopata mimba hawatafukuzwa shule na badala yake wataendelea na masomo baada ya kujifungua na kumaliza likizo ya uzazi na watakaowapa ujauzito watachukuliwa hatua za kisheria. Akiwasilisha rasimu ya Sera ya Elimu na Mafunzo jana kwa wabunge kwa ajili ya kutoa maoni yao jana Dodoma, Mchambuzi wa Sera kutoka Wizara ya Elimu na Mafunzo ya Ufundi, Calistus Chonya alisema rasimu hiyo inapendekeza mwanafunzi atakayeanza darasa la kwanza awe na miaka sita tofauti na sasa, miaka saba. Akifafanua hilo kwa gazeti hili, Waziri wa Elimu na Mafunzo ya Ufundi, Dk. Shukuru Kawambwa alisema sera hiyo itaanza kutumika mara mchakato wake utakapokamilika na mategemeo ya Serikali ni ianze mwakani. Akifafanua zaidi juu ya lugha ya kufundishia, Dk. Kawambwa alisema kwa elimu ya sekondari na msingi itakuwa Kiswahili na Kiingereza tofauti na sasa ambapo kwa upande wa sekondari ni Kiingereza pekee. Shule za awali itakuwa Kiswahili na ualimu lugha ya kufundishia ni Kiswahili na Kiingereza. “Shule nyingine zitatumia Kiingereza na nyingine zitaruhusiwa kutumia Kiswahili kwa upande wa sekondari,” alifafanua zaidi Dk. Kawambwa na kuongeza kuwa shule za msingi zilizopo nchini ni 16,000 na sekondari za Serikali ni 3,000. Chonya akifafanua zaidi juu ya sera hiyo, alisema watakaoandikishwa elimu ya sekondari itakuwa lazima wamalize na kuondokana na utoro. Kwa maana hiyo, alisema sasa mtoto anapoanza darasa la kwanza lazima amalize kidato cha nne na si la saba na kuwa na hiari ya kuendelea sekondari. Alisema elimu ya awali itakuwa mwaka mmoja, msingi miaka sita, sekondari miaka minne, sekondari ya juu miaka miwili na elimu ya juu si chini ya miaka mitatu. “Imeonekana si vema watoto wa shule ya awali ambao wataanza wakiwa na miaka mitano kusoma shule za bweni na wote watasoma kutwa kwa kupatiwa mahitaji muhimu,” alisema Chonya. Mbali na hayo, alisema wanafunzi watakaokuwa na uwezo kiakili wataruhusiwa kuruka darasa na wale wazito kuelewa watapewa nafasi kusoma zaidi na kutoendelea na darasa la mbele. Alisema msingi wa upataji cheti cha kumaliza elimu itakuwa upimaji mafunzo ya kila siku na mitihani ya mwisho. “Elimu ya maadili, utaifa, uzalendo, ujasiriamali itakuwa sehemu mafunzo ngazi zote na pia michezo itakuwa sehemu ya mitaala katika shule na vyuo,” alisema. Kwa sasa, Tanzania inatumia Sera ya Elimu ya mwaka 1995; Sera ya Elimu ya Ufundi ya mwaka 1996 na Sera ya Elimu ya Juu ya mwaka 1999. Sera mpya itatumika kuanzia elimu ya awali hadi vyuo vikuu. Mkakati wa kuandaa sera hiyo mpya ulianza mwaka 2008 na miongoni mwa waliopewa kazi hiyo ni mtaalamu mwelekezi, Abubakar Rajabu ambaye amewahi kuwa Katibu Mkuu wa wizara hiyo. Wakichangia rasimu hiyo, kati ya wabunge 30 waliochangia, 10 wamepinga elimu ya msingi kwa miaka sita na kutaka iwe saba au nane huku Dk. Kawambwa akiahidi suala hilo kuangaliwa kwa undani. Mbunge wa Bunda, Stephen Wasira (CCM) alisema “sasa kuna wanafunzi wengi wanamaliza darasa la saba hawajui kusoma, nilitegemea mngeongeza miaka, sasa mtoto anamaliza msingi akiwa na miaka 12 ataenda wapi, aende kwa mama yake?” Naye Mbunge wa Makete, Dk. Benelith Mahenge (CCM), alisema elimu ya msingi iwe miaka minane na sekondari iwe mitatu huku akiituhumu Wizara ya Elimu na Mafunzo ya Ufundi kuwa inaua ufundi na kutoa mfano kuwa Ujerumani imewasaidia kwa kujikita kwenye ufundi. Mbunge wa Simanjiro, Christopher ole Sendeka (CCM), alisema sera hiyo imeonesha ubaguzi kwa kutoweka mipango kusaidia jamii zilizo nyuma kielimu na kuachana na muda wa miaka sita kwa elimu ya msingi na kuwa saba au nane.